Tá dian iomaíocht san #Guinness PRO14 agus gan ach ceithre chluiche sraithe fágtha ag na foirne ar fad.

Edinburgh v Laighin

Dé hAoine 19.35

Tá sé cinntithe go mbeidh Laighin ar bharr Rann B ag deireadh na sraithe, tá siad 22 pointe chun tosaigh ar Benetton atá sa dara háit. Bhuail siad na Cheetahs ina gcluiche deiridh san RDS, rud a chiallaíonn go mbeidh siad sna cluichí leath cheannais agus go mbeidh siad ag imirt sa bhaile.

Beidh siad in ann sna cluichí sraithe atá fágtha acu deis imeartha a thabhairt dá gcuid imreoirí óga agus cluichí i gCorn na hEorpa le himirt fós acu freisin.

Tá dhá chluiche as a chéile caillte ag Edinburgh, dúshlán mór dóibh anois cáiliú do na cluichí leath cheannais mar gheall go bhfuil siad seacht bpointe taobh thiar do na hUltaigh atá sa triú háit i Rann B.

Ach tá Edinburgh ag pleanáil don bhliain seo chugainn le dhá dhea-scéala an tseachtain seo. Beidh imreoir idirnáisiúnta na hAlban, Jamie Bhatti ag imirt leo an bhliain seo chugainn agus tá a n-imreoir idirnáisiúnta eile, Henry Pyrgos, i ndiaidh conradh nua dhá bhliain a aontú.

Bhí dea scéalta ag Laighin an tseachtain seo freisin. Ta Joe Tomane, Luke McGrath, Dan Leavy agus Nick Mc Carthy ar ais i mbun traenalá, níor imir Tomane agus McCarthy ó Mhí na Samhna seo caite agus gortaíodh McGrath sa chluiche Eorpach i gcoinne Tolouse i Mí Eanáir.

Ach beidh na himreoirí idirnáisiúnta Robbie Henshaw, Josh van der Flier agus Devin Toner ar iarraidh agus an triúr acu gortaithe.

Connachta v Benetton

Dé hAoine 19.35

D’aimsigh Connachta sé úd nuair a bhuail siad na Ospreys ina gcluiche deiridh i mbabhta 17 agus tá siad ar chomh phointí i Rann A le na Cardiff Blues le 47 pointe araon.

Tá Glasgow agus na Muimhnigh san chéad agus sa dara háit i Rann A agus tá gach cosúlacht ar an scéal gur b’iad Connachta nó na Cardiff Blues a bheidh sa triú háit agus áit sna cluichí leath cheannais cáilaithe a bhaint amach agus tá coimhneas scórála níos fearr ag Connachta faoi láthair.

Casfaidh Connachta agus na Cardiff Blues ar a chéile i mbabhta a 20 den Guinness Pro 14, an dara cluiche deiridh sraithe agus beidh Connachta sa bhaile sa Sportsground don chluiche sin.

Tá ocht gcluiche as a chéile sa Guinness Pro 14 buaite ag Benetton agus iad sa dara háit i Rann B, ach níl ach ocht bpointe sraithe idir ceithre fhoireann, Benetton, na hUltaigh, na Scarlets agus Edinburgh.

Beidh Benetton ag imirt foirne Éireannacha sna chéad trí chluiche eile, Connachta agus Laighin in Éirinn agus ansin Cúige Mumhan san Iodáil mar sin beidh na seachtainí beaga romhainn amach rí thábhachtach agus dúshlánach.

Mumha v Zebre

Dé Sathairn 19.45

Bhí an aimsir go dona sa Bhreatain Bheag nuair a bhuail na Scarlets Cúige Mumhan ina gcluiche deiridh i mbabhta 17, cé go raibh an chuid is mó den imirt ag na Muimhnigh sa chluiche sin.

Chiallaigh sé sin go bhfuil siad anois san dara háit i Rann A, trí phointe chun gcúil ar na Glasgow Warriors, ach beidh siad ag iarraidh críochnú ar bharr Rann A agus cluiche leath cheannais sa bhaile a bheith acu.

Tá dian choimhlint ag na Scarlets, níl ach ocht bpointe idir na foirne atá sa dara, triú, ceathrú agus cúigiú háit i Rann B agus beidh dhá fhoireann acu sin ag dul isteach sna cluichí leath cheannais cáilaithe agus i gCorn na hEorpa an séasúr seo chugainn.

Bhí bua na Scarlets i gcoinne Chúige Mumhan an tábhachtach, an chéad uair a buaileadh an Mhumhain in ocht gcluiche sraithe sa Guinness Pro 14.

Ní bheidh Joey Carbery ar fáil don chluiche seo i bPáirc Thuamhumhan.

Tá súil ag Dave O’Callaghan a bheith ar ais ag traenáil an tseachtain seo ach tá Brian Scott, James Cronin, Ciaran Parker, Tommy O’Donnell agus Sammy Arnold fós ag fáil comhar leighis.

Ulaidh v Isuzu Southern Kings

Dé Sathairn 17:30

In ainneoin gur tugadh cardaí buí do thriúr imreoirí nahUltaigh sa chluiche i gcoinne na Dragons i. Mbabhta 17, d’éirigh leo an bua a bhaint amach a chluiche sin a 28 a 15.

Chinntigh an bhua sin go bhfuil Uladh san triú háit i Rann B, níl ach ocht bpointe idir na foirne atá sa dara, triú, ceathrú agus cúigiú háit i Rann B Beidh dhá fhoireann acu sin ag dul isteach sna cluichí leath cheannais cáilaithe agus i gCorn na hEorpa an séasúr seo chugainn.

Beidh Ulaidh ag súil le cúig phointe sraithe i gcoinne na Kings – ach beidh dian iomaíocht sna cluichí eile atá fágtha acu, Edinburgh agus Glaschú in Albain agus Cúige Laighin san Kingspan.

Níor éirigh leis na Kings ach dhá chluiche a bhaint i sraith na bliana seo agus níl acu ach fiche pointe sraithe as seacht gcluiche dhéag.